Die wrede verminking van ‘n bullmastiff, wie se oë met ‘n mes uitgesteek is, het vroeër vanjaar opslae gemaak.

Marin Block (21) het na bewering die hond, wat by die stortingsterrein ‘n waghond was, gesteel. Hy het hom daarna na Masakhane geneem en sy oë uitgesteek. Die hond is later verwese langs ‘n straat gevind en moes deur ‘n geskokte veearts, Dr Liesel Trollope, uitgesit word. Mnr Phillip Schreck van BARC het gesê dat dit ‘n pragtige saggeaarde bullmastiff van 80kg was. Block is drie dae later gearresteer nadat ooggetuies hom met die diefstal van die hond verbind het. Hy is aangekla van diefstal en die oortreding van die Dierebeskermingswet. Borgtog is geweier en hy is sedertdien in aanhouding. Hy staar nou verdoemende bewyse in die gesig nadat die mes wat by hom gevind is forensies ondersoek is en die uitslag van die DNA-toetse positief was. Die laboratoriumverslag bewys dat die bloed wat op die mes se hef gevind is dié van die bullmastiff is. Block het wel die mes na die voorval gewas maar daar is steeds bloed op die mes gevind. Block se verhoor in Hermanus se Landdroshof is uitgestel tot 6 Maart. Hy bly in aanhouding.
Francois de Jongh