Tot en met die afgelope naweek was die nuus nie so vreeslik opwindend nie. Die geelbek wat by die Eiland uitgeslaan het was blykbaar van korte duur en het al skaarser geword. As troosprys het kleiner kabeljou by die Vlagpaal gesig gewys, maar indien daar enige ordentlikes uitgekom het was dit ‘n staatsgeheim.

Gelukkig het die hotties darem besluit om ordentlik te byt en as toegif is daar heelwat van hulle gevang. Die uitstaande kenmerk was dat die see ‘n baie hoë graad van 18 gehad het en selfs ietsie hoër as 19 grade is uitgewys. Hoewel hierdie temperatuur op die oog af ideaal lyk is dit te hoog  --  dit blyk dat die vis lui raak om in die hitte te byt. Waaroor nie gekla kan word nie is indien die temperatuur so 14, 15 is. Selfs die vis in ‘n visdam sal nie nou kos inneem nie, kyk maar. Ons kan maar hoop dat die weersomstandighede(?) wat hierdie toestand veroorsaak nie gaan voortduur nie en ons dan behoorlik kan baljaar onder die vis. Geelstert is ook gewaar naby die Punt maar soos gewoonlik kon jy maar net kyk en lippe aflek  --  die vis swem agter jou gevange hottie aan en loer-loer so vir jou, maar byt, aikôna!
Die manne wat probeer vir kreef vaar eweneens nie goed nie. Daar is altyd die ouens wat jou vertel van die baie wat hulle, só maklik vang, maar wýs dan gesels ons weer. Nader aan die waarheid is dat jy hoor van net een of twee, drie in hóéveel nette. Nie goeie nuus nie. Dis welbekend dat kreef nie hou van warm water nie, en dit is mos ons probleem op die oomblik. Byt maar vas, dit sal beter gaan.
Groete, Seemeeu