Die ex-Gansbaaier, Hannes Vermeulen alias “Hannes Saag” van wie Gansbaai Courant vroeër vanjaar geskryf het, is as  ‘n  eregas by die 10de jaarlikse New York City Musical Saw Festival op 1 Junie vanjaar in die Trinity Lutheran Church, Astoria, New York ontvang. Sowat 50 saagspelers van heide en verre het opgedaag en voor sowat 300+ feesgangers op hul sae gespeel. Die Saagmusiek-Fees het vanjaar onder die direkteurskap van Natalia Paruz, bekend as die “Saw Lady”, plaasgevind. Hannes, wat as Suid-Afrika se eerste saagspeler bekendstaan, het die land tydens die fees gaan verteenwoordig. Andy Battaglia, joernalis van die NYC Wall Street Journal (U.S. Edition), skryf soos volg oor die Suid-Afrikaner: “Hannes Vermeulen had ventured from Langebaan, South Africa, making him the festival’s guest of honor - the saw player who’d travelled the longest distance to Queens. Back home, he’d been a contestant on the TV show “SA’s Got Talent”, so local leaders helped raised funds to send their hometown hero to New York.

The 66-year-old saw man performed a portion of his nation’s national anthem. Asked why the musical saw is the instrument he chooses to play, Mr. Vermeulen replied it’s the only instrument he can play!” Hannes het reeds in 1954 saam met sy ouers vanaf Parow Vallei na Gansbaai verhuis, waar sy pa onder andere die destydse Eureka Losieshuis bedryf het. Hy was tot 1960 in Gansbaai op skool. Dit het hom sowat 2 jaar geneem om die saag as  ‘n  musiekinstrument te bemeester, iets wat hy al vir 40+ jaar doen. “Die bywoning van die New York City Musical Saw Festival as die enigste Suid-Afrikaner was nie net  ‘n  groot voorreg en eer nie, maar ook  ‘n  hoogtepunt in my lewe,” het Hannes gesê.       
      
Hardus Botha