Die Raad het ‘n   nuwe verordening vir die geïntegreerde bestuur van afval aangeneem. Dit vervang die bestaande verordening rakende die bestuur van vaste afval wat in 2007 gepromulgeer is. Met die nuwe verordening voldoen die munisipaliteit aan die statutêre vereistes van die Wet op Nasionale Omgewingsbestuur: Afval van 2008 en verskeie ander standaarde, regulasies en riglyne vir afvalbestuur in ‘n   munisipale konteks. Die doel van die wetgewing is om ‘n   volhoubare praktyk te skep vir afvalbestuur wat op die vermindering van afval en omgewingsbewaring fokus. Die nuwe verordening bevat ‘n   nuwe stel definisies wat van toepassing op vaste afval is en bepalings wat onder meer die insameling van vullis, die hantering van verskillende soorte afval, die vervoer en wegdoening van afval, die voorkoming van rommelstrooiing en onwettige storting, die kontraktering van eksterne diensverskaffers en wetstoepassing reguleer. Die konsep-verordening is vir publieke kommentaar geadverteer, maar geen insette is ontvang nie. Die verordening sal van krag word sodra dit in die Provinsiale Koerant gepromulgeer is.
Fanie Krige