Edna van der Linde by die Advent Kalender wat sy self gemaak het, wat spesiale verrasssings vir kinders gedurende Desember inhou

“Behalwe vir ons lede, is vakansiegangers hartlik welkom om van ons Biblioteeldienste gedurende die vakansietydperk gebruik te maak,” sê Sharman Geldenhuys, Gansbaai Biblioteek se Bibliotekaris. Sy sê voorwaardes sal geldig wees, terwyl ‘n versoek ook aan vakansiegangers gerig word om hul persoonlike besonderhede op die stelsel op datum te bring. Dan moedig sy ook kinders aan om boeke gedurende die vakansietydperk uit te neem. “Kinders moet ook kennis neem van ons gewilde Inkleurkompetisie vanaf 1 tot 20 Desember,” sê sy.

Een van die personeellede, Edna van der Linde, het ‘n pragtige Advent Kalender op eie houtjie ontwerp en gemaak. Sharman sê hierdie kalender gaan vele verrassings vir kinders gedurende Desember inhou. Sharman en haar personeel bedank graag almal vir die goeie ondersteuning, maar veral die gereelde skenkers van nuwe boeke op ‘n gereelde basis. “’n Spesiale dankie aan Bettie wat op ‘n maandelikse basis nuwe boeke aan ons skenk,” sê Sharman. Die Biblioteek se vriendelike en behulpsame personeel bestaan uit Sharman Geldenhuys (Bibliotekaris), Zelda Fourie, Edna van der Linde en Busisiwe Mtatase.

Gansbaai Biblioteek se gerieflike bedryfsure is steeds Maandae tot Vrydae vanaf 09:30 tot 17:30, met die volgende uitsonderings. Vrydag, 6 Des: 09:30 - 13:00; Dinsdag, 24 Des: 09:30 - 13:00; Woensdag, 25 Des: Gesluit; Donderdag, 26 Des: Gesluit; Dinsdag, 31 Des: 09:30 - 13:00; Woensdag, 1 Jan: Gesluit; Donderdag, 2 Jan: Gesluit. Na die vakansieseisoen sal sake weer normaliseer. 

“Namens myself en die personeel wens ek elkeen van u ‘n ontspanne feesseisoen toe, met ‘n Geseënde Kersfees en ‘n Voorspoedige Nuwe Jaar, wat ek vertrou met vreugde, sukses en goeie gesondheid gevul sal wees,” sê Sharman. Enige biblioteeknavrae kan aan 028-384-8300 (Munisipale skakelbord) gerig word. 

Hardus Botha