‘n Deel van die groep mense wat die Vissermans Dankseggingsdiens in Gansbaai Hawe bygewoon het

Die Interkerklike Vissermans Dankseggingsdiens op 8 Desember in Gansbaai Hawe is goed bygewoon en die verrigtinge het vlot verloop. “Ek is tevrede met die opkoms en is baie dankbaar dat die wind vanaand heelwat rustiger is as vroeër vandag en die vorige paar dae,” het Johan van Dyk, organiseerder gesê. Dr Tom Theunissen van Nuwe Hoop Bedieninge het die verwelkoming en openingsgebed waargeneem. Soos gebruiklik het die diens met hartlike samesang begin. Gewyde Afrikaanse en Engelse liedere is om die beurt gesing. Die begeleiers en voorsangers, Dirk en Eva Buchner, Mike Schröder en Adri Ehlers, asook Elize Schröder met die klankstelsel, het hul uitstekend van hul taak gekwyt.

Past Jacob Prins het die Engelse boodskap aan die toehoorders oorgedra. Hy het sy boodskap op Fil 4:4-7 baseer: “Gelowiges word opgeroep tot gebed midde groot krisisse - dit is al hoe redding sal kom.” Die Afrikaanse gedeelte is deur Lizette Janse van Rensburg aangebied. Lizette het die toehoorders met pragtige sang en persoonlike getuienis bedien. “Dit is vir my ‘n voorreg om te kan dankie sê vir elke keer wat die vissermanne veilig teruggekeer het,” het sy onder andere gesê. Past Frikkie Zeelie het soos gebruiklik seker gemaak die kinders wat soet gesit en luister het, ontvang elkeen ‘n pakkie lekkergoed om huis toe te neem. Die Vissermans Dankseggingsdiens is deur Gansbaai Marine geborg, wat opreg deur die organiseerders waardeer word.

Hardus Botha