Die nuwe naam vir Gansbaai Gateway Sentrum, die Great White Junction, wat reeds op die gebou aangebring is

Gansbaai Gateway Sentrum se naam is so stil-stil en kort voor die vakansie-seisoen na die Great White Junction verander en die gedagte het ontstaan hoeveel inwoners dit agtergekom het. Een van die eienaars van die gebou, Roelou Slabber van die Kaap, het gesê die span van Arbitrage se konsultant, Caroline Coates, sal in die nuwe jaar ‘n persverklaring in hierdie verband uitreik om relevante vrae oor die naamsverandering te beantwoord. Roelou het gemeld dat die naam “Gateway” verwarring veroorsaak met Hermanus se “Gateway”-sentrum.

Tydens Gansbaai Courant se navrae het dit geblyk dat daar nie eenstemmigheid onder die huurders oor die naamsverandering heers nie. Onder andere het een van die huurders, wat verkies om anoniem te bly, die volgende gesê: “Ons is gedurende April/Mei gekontak oor die moontlike naamsverandering. Die eienaars wou oor Paasnaweek ‘n groot geleentheid daarvan maak, wat op die huurders se versoek uitgestel is. Daarna is ons nie weer gekontak nie. Ons voel dat die naamsverandering nie goed deurdink is nie.” Van die belangrikse besware is die kostes wat onder andere deur adresverandering by banke, Telkom, munisipaliteit, briefhoofde en veel meer meegebring sal word, asook 2014 kalenders wat reeds gedruk is en waarop die vorige naam van die sentrum reeds aangebring is.

Hardus Botha