Babalwa Mangela met haar pasgebore baba in Gansbaai SAPD se gebou, met AO Blanche Augustyn langs haar wat die baba gevang het

Dit was behoorlik konsternasie op die stasie by Gansbaai SAPD se kantore toe die Ooievaar vir ‘n onverwagse landing daar neergestryk het. Babalwa Mangela van Masakhane het op Woensdag, 16 April 2014 by Gansbaai polisiestasie ingekom en gevra hulle moet dringend ‘n ambulans vir haar skakel - sy gaan geboorte aan ‘n baba skenk.

Cassie Carstens van Overstrand Medical Rescue is geskakel, maar die Ooievaar was vermoedelik te haastig vir ‘n volgende aflewering wat gedoen moes word. AO Blanche Augustyn van die polisiestasie het ingegryp en die baba daar en dan gevang. Met Cassie en sy span se aankoms het hy net die naelstring geknip en die plasenta uitgedruk, “verder was alles onder beheer!” Dit is ‘n dogtertjie en ook Babalwa se vierde kind. Sonder dat sy gevra is, het sy spontaan gesê die dogtertjie se eerste naam is Blanche, vernoem na haar “vanger”. Blanche het Gansbaai Courant meegedeel dat dit die 6de baba is wat sy al gedurende haar werksure gevang het.

Hardus Botha