Andries Laubscher as die Sirkusmeester tydens sy 30ste verjaardagvieringe, saam met een van die narre

 “Onse” singende Andries Laubscher het op 29 Julie sy 30ste lewensmylpaal bereik. Daarvoor is ‘n gesellige partytjie vir hom by Overberg Boothengelklub gereël….met ‘n “Sirkus”-tema. Genooide gaste het met baie oorspronklike sirkus-kostuums opgedaag, soos leeutemmers, sweefstok-artieste tot by narre. Die “Man-van-die-Aand” was natuurlik die Sirkusmeester (Ringmaster), Andries homself en te oordeel aan die foto’s wat ingestuur is, was dit ‘n baie gesellige verjaardagviering wat hom te beurt geval het.
Hierdie talentvolle jongman is oorspronklik van die Weskus en vandat hy sowat 13 jaar gelede na Gansbaai gekom het, het hy sy musiekloopbaan ernstig begin opneem.

Verskeie optredes het gevolg, soos Idols Supersterre, Matt Hurter se optredes, Snater Teater, vyf optredes tydens die jaarlikse Fees van die Ganse, keuring vir die Gansbaai Top 10 CD tydens 'n vorige Fees van die Ganse, optrede tydens die jaarlikse Kreef Derby, Ek kan doen met 'n Miljoen saam met Casper de Vries, die Blommefees in Darling en veel meer. Intussen is hy gekeur om aan Johan Stemmet se 39ste reeks van Noot-vir-Noot deel te neem wat heelwat later gebeeldsend sal word. "My werklike hoogtepunt in my lewe was die vrystelling van my eerste CD, Uiteindelik, gedurende 2007," vertel Andries. Intussen is sy 2de CD, Maak dit lekker, vanjaar vrygestel. Op 29 Augustus is hy weer by Prince Alfred Hamlet en 13 September in Stanford. Bedrywige jongman, maat ook uiters talentvol en Gansbaai mag maar trots wees op hom.

Hardus Botha