Johan de Villiers van Ingangstraat 22, De Kelders, het besluit om iets anders as die “gewone” op sy woning te plaas wat lustig deur die wind rondgedraai kan word - ‘n vis - dit pas by Gansbaai. Die netjiese visbeeld van ±1m is van hout gemaak en met glaskrale versier om dit soos ‘n ware “blinklyf” in die son te laat lyk wanneer dit deur die wind rondgedraai word. 

“Om houtwerk en allerlei goedjies te maak is ‘n stokperdjie, maar ek maak net iets wanneer ek die gier kry om dit te maak,” vertel Johan. ‘n Tyd gelede het hy ook ‘n seemeeu van hout gemaak wat op die ander hoek van die woning aangebring is, “maar dis te swaar en wil nie so lekker draai nie en toe maak ek die vis.” Johan en sy eggenote, Tertia, woon sedert 1982 in De Kelders. Soort vis? “Nee-wat, ek het sommer na ‘n visblikkie se foto gekyk en besluit dit lyk beter as die tradisionele hoenderhaan of wat ookal, en toe daaraan begin werk,” sê Johan.

Hardus Botha