“Die Sea Stars Netbalklub het op 12 April aan die openingswedstryd te Caledon deelgeneem,” vertel Bertruline Dickson.

“15 netbalspanne is as lede van die nuutgestigde Overberg Netbal Unie geregistreer.” Die Sea Stars het al 4 hul wedstryde teen Hangklip, Swellendam, Zwehile en Happy Hearts gewen. Op Saterdag, 3 Mei het hulle in ‘n vriendskaplike wedstryd teen Safcol van Grabouw gespeel, met die tellings soos volg: hulle B-span wen 10-9 en die A-span wen 31-8. “Ons het daardie wedstryd as ‘n goeie oefenwedstryd vir ons eerste liga-wedstryd te Caledon beskou,” sê Bertruline. Daardie wedstryd het op Saterdag, 10 Mei plaasgevind en die uitslae was soos volg: hulle A-span wen teen Hermanus 19-10 en die B-span wen teen Hawston 15-13.

“Ons het groot waardering vir al ons borge en ondersteuners en ons probeer Gansbaai se naam hoog hou,” sê Bertruline. “Ons was immers verlede jaar ook die wenners van die liga A- en B-spanne, asook die naaswenners in die Overstrand Burgemeesterstrofeë kompetisie. Ons wil graag voortbou op hierdie prestasies, maar is steeds opsoek na ‘n afrigter om te kom help.”

Navrae kan aan Bertruline Dickson by 072-707-5687 gerig word.

Hardus Botha