“ Wie beweer dat hy in Hom bly, behoort self ook te lewe soos Jesus gelewe het.” (1Joh 2:6) “Hiérin het die liefde sy doel volkome met ons bereik.... in hierdie wêreld lewe ons reeds deur die liefde net soos Jesus.” (1Joh 4:17)

Jy kan maar sê wat jy wil van ander godsdienstige groepe, maar as jy na die Moslems kyk dan sien jy dadelik hulle is Moslems en hulle leef hulle geloof volkome uit. ’n Jood sal stiptelik elke dag sy roetine volg en sy gebede opsê. ’n Boeddhis sal vier uur  in die môre opstaan en kilometers vêr loop om sy daaglikse toewyding ritueel uit te voer. Die vraag wat ek wil vra is dit: Kan die wêreld sien ons is Christene? Lyk ons soos Christene en tree ons op soos volgelinge van Jesus Christus?

Kom ons praat vandag en die volgende paar weke met mekaar ernstig en biddend saam oor die feit dat ons meer en meer soos Jesus moet lyk en optree. Kom ons vra onsself die vraag af of mense in ons optrede Jesus kan raaksien of nie. In sy boek “The Christian Atheist”  wys Craig Groeschel daarop dat dit juis die Christene se leefstyl is wat hulle onchristelik maak. Ons is nie net in die wêreld nie, ons lyk ook soos die wêreld! Ons is onvriendelik, onbeskofte en ongeduldige bestuurders, geldgierig en afgunstig op mekaar. Dis ons leefstyl wat ander gelowe afstoot en maak dat baie min mense in die moderne wêreld hulle tot die Christendom bekeer!

“Meer en meer soos Jesus” beteken dat ons bereid sal wees om teenoor alle mense  te reageer soos Jesus gedoen het. Al was Hy ’n Jood van geboorte het hy teenoor die Samaritane wat eintlik die Jode vyandiggesind was, vriendelik en tegemoetkomend opgetree het. Dink maar hoe vriendelik was Hy met die Samaritaanse vrou by die put. (Johannes 4) En sy was ’n vrou met ’n reputasie! Let net op hoe ons in ons dorp se strate by mekaar verbystap sonder om te groet, of ’n vriendelike woord te sê. As jy my nie glo nie, kyk ’n bietjie rond hoeveel mense jou nie eers in die oë kyk as jy met hulle praat nie. As jy in die straat stap kan die ander mense sien jy is ’n kind van Jesus?

Ongelowiges, nie-christene, lees nie die Bybel nie – die enigste teks wat hulle kan lees is ons lewens. Jy is Jesus se lewensgrootte advertensiebord wat heeldag moet adverteer dat jy Sy kind is. As skoolkinders in die straat stap kan jy aan hulle uniforms sien watter skool hulle verteenwoordig. Jou oë en jou glimlag, ja, jou gesindheid is ’n bewys van watter geloof jy aanhang. Kom laat ons bewustelik begin om meer en meer soos Jesus te dink – en dan ook só te leef! Dit is GOD se gróót opdrag aan elke Christen!