‘n Fantastiese geleentheid het leerders van Academia te beurt geval. Me Elana Bredell van NB-uitgewers het ‘n skryfwerkswinkel vir leerders van Gansbaai Academia moontlik gemaak.  As jy dus ‘n aspirant-skrywer is, is hierdie die geleentheid om jou drome waar te maak.

21 Afrikaanse leerders van Gansbaai Academia het vroeg op Saterdag, 26 Julie opgestaan en die gure weer trotseer om die skryfwerkswinkel by te woon.  Die werkswinkel is aangebied deur Me. Maya Fowler, bekende skrywer van Afrikaans en Engelse boeke.   Leerders skryf elkeen ‘n kortverhaal wat deur Maya nagesien gaan word en die beste kortverhaal in die graad gaan ‘n boekprys wen.  Boeke vir die boekprys is twee van Maya se boeke en 3 van ander skrywers.

Die Afrikaanse opvoeders van Academia is baie opgewonde oor hierdie  inisiatief van NB- uitgewers en baie dankbaar vir al die ondersteuningsmateriaal wat aan die skool geskenk is.  Dit was lekker om te sien hoe leerders se skryftegnieke en potensiaal ontgin word.  ‘n Aangename atmosfeer het heeltyd in die sessies geheers en leerders was trots om hul “stories” met ander te deel.  Leerders kon ook pryse wen en dit het gesorg vir lekker pret.

Dit is ‘n groot voorreg wat ons te beurt geval het en ons kan nie genoeg dankie sê nie.

Carien Fortuin