Vlnr is John Karelse, Patrick Tities, Gilbert Mmereki, Francois du Preez en Concelia Motloung agter die 4,101 ontskulpte perlemoen waarop hulle beslag gelê het

Die Seevisserye-span het op Sondag, 27 Oktober 2013 om ±08:30 op ‘n groot hoeveelheid ontskulpte perlemoen en ‘n gesteelde silwer Corsa bakkie beslag gelê. “Ons het inligting ontvang dat ‘n besending perlemoen vanuit Masakhane vervoer sou word, maar was nie seker van die roete wat gevolg sou word nie,” vertel Hoofinspekteur, Gilbert Mmereki van Seevisserye. Hulle het daarna op verskillende bekende roetes stelling ingeneem en gewag. ‘n Netjiese silwer Corsa bakkie met registrasienommer CF 148-761, is voor Bella Vista op die R43 afgetrek en 4,101 ontskulpte perlemoen is gekry. Beslag is op die perlemoen en bakkie gelê en die bestuurder is in hegtenis geneem. Gilbert se helpers was Senior Inspekteur Concelia Motloung en Inspekteurs Francois de Preez, John Karelse en Patrick Tities. Intussen is vasgestel dat die voertuig in Gugulethu-Wes as gesteel aangemeld is. Die bestuurder van die bakkie, Tando Galata (30) van Gugulethu-Wes het op Maandag, 28 Oktober 2013 in die Hermanus Landdroshof verskyn. Hy is borgtog geweier en sal in aanhouding bly, aangesien die voertuig waarmee hy gery het as gesteel aangemeld is.   
Hardus Botha