‘n Gesellige oomblik tydens die suksesvolle Stilbaai Kushengelkompetisie, met Oktober se wenner, Oubaas Lesch op die inlasfoto

Die Overberg Kushengelklub het goed onder die galjoene gevang tydens hulle maandkompetisie op 12 Oktober. Oubaas Lesch het met sy 2 galjoene en ‘n steenbras as oorwinnaar uit die hengelstryd getree. Tweede was Morné Olivier met ‘n galjoen en ‘n kabeljou, met Wynand Viljoen in die 3de plek met sy galjoen. “Baie dankie aan Doreen Fourie vir die heerlike hoenderpastei en Ans Claassen vir die slaaie,” sê Maynard (Snr) van Niekerk.

Sy bedankingslys van borge (alfabeties) vir die kompetisie wat op 16 November gaan plaasvind, is: Boat House restaurant, Christe Bella Health & Beauty, Gansbaai Sport & Tackle, Hennie Kriel Bouers, Hermanus Liquor Store en Walkerbay Liquor Store.

Met verwysing na die vorige berig (Gansbaai Courant, Donderdag 10 Oktober 2013), die volgende regstellings: Die gesinsnaweek was te Stilbaai en nie Stilfontein nie en die drie wenners se totale is as “punte” weergegee in plaas van kilogram. “Dan net weer ‘n groot dankie aan Jan de Kock van die plaas Kograh vir die braaivleis tydens die Stilbaaikompetisie,” sê Maynard. “Nuwe lede is altyd welkom om nie net in ons hengel-aktiwiteite te kom deel nie, maar ook ons gesellige samesyn.”

Die Overberg Kushengelklub se volgende klubkompetisie (oop-area) is op 16 November 2013. Lyne-in is om 04:00 en die skale sluit om 17:00 by die Klubhuis.
Vir navrae kan die Wedstrydsekretaris, Leibrandt van Niekerk by 082-487-3106 gekontak word, of stuur ‘n epos aan hom by bietouprops@gmail.com.

Hardus Botha