Sers Frans Groenewald dra Mathia Schwegler na veiligheid vanuit die kloof, waar sy vir ± 40 uur vermis was.
'n Bejaarde 71-jarige vrou het Saterdagmiddag in die veld vermis geraak en is eers twee dae later gevind.
Mathia Schwegler is 'n fynboskenner en skrywer van 'n boek wat handel oor die gebruik van medisinale fynbosplante in ons omgewing.

Mathia Schwegler

Sy is ongedeerd, maar baie verward in 'n bergkloof op hul plaas, Heidehof, tussen Franskraal en Baardskeerderbos gevind. Sy was die Saterdagmiddag in die tuin besig, maar het nie na die huis teruggekeer nie. Haar man, Walter, het aanvaar sy is na hul dogter, Nayna, wat ook daar naby op die plaas bly, en dat sy daar sou oorslaap. Nayna het egter vir hom die Sondagmiddag gesê dat Mathia nooit by haar opgedaag het nie. Sy is as vermis by die polisie aangegee en sers Frans Groenewald van die SAPD het onmiddellik 'n soektog na haar gelei. Hulle het die dele van die plaas waar sy gereeld gaan stap gefynkam, maar kon geen spoor van haar kry nie.
"Dit het toe donker geword en ons moes tot die volgende oggend tou opgooi. Die soekgeselskap was Maandag vroeg op die toneel en die bergklowe agter hul huis is deursoek.
'n Helikopter en honde-eenheid is ook ontbied en omliggende boere en hul plaaswerkers was ook op pad om met die soektog te help. Die helikopter was reeds vanaf Kaapstad by Hermanus onderweg toe Mathia se man om 08:30 in die kloof naby hul woning op haar afgekom het," het Sers Groenewald gesê. Sy was gedisoriënteerd en gedehidreer, maar nie beseer nie.

Volgens sers Groenewald het sy op die grond gesit en kon nie self opstaan nie. Sy was ook baie dors en het net daar sowat 2 liter water gedrink.
Die Schweglers se Heidehof Fynbos Nature Trail is sinoniem met Mathia en weens haar kennis baie gewild.
Francois de Jongh