"Skaatplankryers sal in die toekoms vasgevat word as hulle aanhou om die padverkeerswet te oortree. Verskeie waarskuwings het die afgelope tyd op dowe ore geval," het Tony Blankenberg, Assistent Superintendent, Overstrand Verkeersdepartement, Dinsdag gesê. Die Munisipale Verkeersregulasie 60 bepaal dat geen skaatsplanke op openbare paaie óf sypaadjies gebruik mag word nie. Die verontagsaming van dié regulasie kan lei tot 'n boete van R200 en Blankenberg versoek die jong mense vriendelik om die wet te gehoorsaam. Hy doen ook 'n beroep op die oortreders se ouers om hulle hieroor aan te spreek. Party van die oortreders is ook baie arrogant wanneer hul aangespreek word en vuil taal is ook al teenoor die amptenare gebruik. "Dit is gevaarlik om in die pad te ry, want hulle kan maklik voor 'n voertuig beland of val. Voetgangers, veral ouer mense, se veiligheid word ook so op sypaadjies bedreig," het Blankenberg gesê. Hy het verder gesê dat hy nie die kinders se pret wil bederf nie, maar dat dit sy verantwoordelikheid is om padveiligheid te verseker. 'n Ondersoek na die moontlikheid om 'n skaatsplankrybaan by die Gemeenskaplike Sportgronde te bou, word gedoen. Die koste is egter baie hoog omdat slegs spesialis skaatsplankry-bouers dit met ingenieursplanne kan bou. Die moontlikheid en koste word egter steeds ondersoek.
Francois de Jongh