Die Masakhane dansertjies, met agter vlnr Anita Botha (2de), Margi Muller (5de) en Evelyn Tshisa (7de)

Margi Muller van Franskraal het ‘n tyd gelede besluit om haar lyndanstalente aan Masakhane-kinders oor te dra. “Ek het ‘n klein groepie kinders bymekaar gekry en ná slegs vier Saterdae is ek heel tevrede met hulle belangstelling, opgewondenheid, samewerking en vordering,” vertel Margi. “Ek het die projek in samewerking Anita Botha en Derrick Jerrard aangepak en begin met basiese lyndanspassies wat mettertyd meer gevorderd sal raak.” Derrick en Anita is saam met Margi klublede van die Birkenhead Boothengelklub, waar hulle op Woensdagaande hulle lyndanspassies onder leiding van Margi beoefen.

Tydens ‘n vorige oefensessie het die groepie sommer goed vertoon en die een was so opgewonde soos die ander een. Marie Reid van Marie's Boutique & Janelle's Nail Salon in Kerkstraat, het oefenspasie vir Margi en haar groepie gereël. “Nou is ek dankbaar dat Masakhane Primêr ‘n klaskamer vanaf 14:00 tot 15:00 op Woensdae aan my afgestaan het vir toekomstige oefensessies,” sê Margi. “Die personeel en leerders is baie positief oor hierdie projek. Een van die onderwysers, Evelyn Tshisa, is baie opgewonde om volstoom by ons in te skakel.” Margi sê al is die spannetjie klein op hierdie stadium, is hulle baie positief en beplan ook om hulself deeglik tydens die Fees van die Ganse se Straatfees op 7 Desember te bewys.

Hardus Botha


Groot leergierigheid was onder die Masakhane kinders te bespeur tydens hierdie lyndans-oefensessie