Mej Fees van die Ganse 2013/14, Mariska Mouers aan diens by die Vriendelike Padblokkade

Die jaarlikse Vriendelike Padblokkade buite Gansbaai bly steeds ‘n verrassingselement vir vele besoekers. In sommige gevalle kan duidelik gesien word hoe daar rondgeskarrel word vir bestuurderslisensies - soms met benoude gesigsuitdrukkings, soms met verontwaardiging. Dan verskyn die breë glimlagte: “Goeie Môre meneer/mevrou, hartlik welkom in Gansbaai en ons hoop julle geniet die verblyf hier!” - en dan word relevante inligtingstukke en ‘n waterbottel oorhandig, met lekkergoed en ‘n Gansbaai “Frizbee” wanneer daar kinders in die motor is.

Glenda Kitley, Gansbaai Toerisme Bestuurder doen haar deel tydens die Vriendelike Padblokkade

“Al vier Whale Coast dorpe het op 13 Desember ‘n vriendelike padblokkade gereël waartydens besoekers verwelkom is,” vertel Glenda Kitley, Gansbaai Toerisme Bestuurder. “Suné Greeff, Overstrandse Bemarkingsbestuurder het gesorg vir waterbottels en “frizbees”, met elke dorp wat verder ‘n eie bydrae gelewer het.” Gansbaai Explore het ‘n kleurvolle Seisoenkalender geborg wat ook uitgedeel is, met advertensies agterop wat deur Toerismelede as hulle bydrae betaal is. Dan het Dyer Island Conservation Trust handige wenke, asook die onlangse munisipale brief laat uitdeel. Gansbaai Toerismekantoor het hulle spesiale “Welkom-T-Hemde” gedra. Die 2013/14 Mej Fees van die Ganse, Mariska Mouers het ook met die verwelkoming van besoekers gehelp. Gansbaai Toerisme personeellede, asook die voormalige Mej Fees van die Ganse, Elzaan van Lill en haar vriendin, het ook tot die vriendelike verwelkoming van besoekers bygedra. “Die ontvangs en reaksie van die besoekers was baie positief,” sê Glenda.     

Hardus Botha

Die voormalige Mej Fees van die Ganse was ook tydens die Vriendelike Padblokkade aan diens