Dit klink nie moontlik vir Gansbaai nie, maar dit was die jaarlikse Beverley Hills Kerspartytjie van Social Help Animal Rehabilitasie & Restourasie Education (SHARE), wat voorheen as Gansbaai Sopkombuis bekend gestaan het. “Daar was sowat 450 plus kinders wat geskenke en verversings ontvang het en dit was ‘n baie gesellige en geslaagde Kerspartytjie, ondanks die harde werk en gespook om deurentyd orde te handhaaf,” sê past Frikkie Zeelie. Die dag is voorafgegaan met ‘n groep lede van Gansbaai Ministers Fraternal met die toedraai van die magdom van geskenke.


Die oop stuk grond langs Beverley Hills is gebruik, met die springkasteel en veral die “skuim”-glybaan wat baie gewild was en die kinders kon na hartelus baljaar. Past Frikkie bedank graag elke harde werker wat voor en tydens die Kerspartytjie gehelp het om van die dag so ‘n groot sukses te kon maak, asook alle donateurs wat deur middel van bydraes en borgskappe ‘n groot rol gespeel het. “Spesiale dank ook aan Gansbaai Superspar wat ons hoofborg was, asook Klein Karoo Bronne Sentrum vir die groot hoeveelheid pragtige geskenke wat hulle voorsien het,” sê past Frikkie. Hy sê ook dat SHARE volgende jaar meer op die Gansbaai Ministers Fraternal gaan steun om die jaarlikse Kerspartytjie meer interkerklik te maak. Kennis kan ook nou reeds geneem word van SHARE se jaarlikse oorhandiging van 100 volledige skooluitrustings aan behoeftige Gr 1 leerders op 13 Januarie 2014.

Hardus Botha