Die rofstoeier, “Disturbed”, lê op die naat van sy rug ná ‘n “ernstige nekbesering”, met Steven Breytenbach (links) en Riaan Buys van Overstrand Medical Response wat besig is om hom te “stabiliseer”

Besoekers aan Saterdag, 21 Desember se Gansbaai Big 2 Town Musiekfees was erg geskok ná ‘n “ernstige” besering in die rofstoeikryt. X-Treme Wrestling Entertainment het ‘n rofstoei-geveg tussen die rofstoeiers “Disturbed” en “Warlock” gereël. Die toeskouers van die stoeigeveg was almal op die agterbeen toe “Disturbed” ‘n “ernstige” nekbesering opgedoen het. Overstrand Medical Rescue se span was op toneel en kon die stoeier “stabiliseer” en per ambulans na die naaste “hospitaal” neem. Wat die toeskouers nie geweet het nie, was dat Overstrand Medical Response, in samewerking met X-Treme Wrestling Entertainment, ‘n oefening gereël het om Overstrand Medical Response se reaksietyd vanaf die voorval totdat die pasiënt in die ambulans gelaai is, te toets. Die stoeier, “Disturbed”, het ongemerk teruggeglip terwyl die volgende geveg aan die gang was. Agterna was van die toeskouers so boos vir die stoeier, “Warlock”, met andere wat erg bekommerd was, dat die seremoniemeester, Kobus Koekemoer, moes afkondig dat dit net ‘n oefening was. “Overstrand Medical Response spreek graag hul opregte dank en waardering uit teenoor X-Treme Wrestling Entertainment uit vir die geleentheid om so ‘n oefening voor toeskouers te kon doen,” sê Riaan Buys van Overstrand Medical Response. “Dit was ‘n waardevolle oefening en baie belangrik vir ons personeel om enige situasie die hoof te bied.” Hulle kontakbesonderhede vir noodgevalle is 078-699-6995, terwyl Cassie by 078-699-6995 en Riaan by 083-881-3631 geskakel kan word. Navrae kan ook aan hulle by overstrandmedics@gmail.com ge-epos word.
Hardus Botha