“Wonderlike nuus! My rekenaar is herstel sonder dat ek enige inligting daarop verloor het,” was verlede week se anonieme leser se eerste woorde toe sy Gansbaai Courant ‘n dag daarna skakel.

Gansbaai Courant het verlede week van ‘n anonieme leser berig (“Ernstige waarskuwing”) wat ‘n kul-oproep (“scam”) ontvang het en daarvan oortuig was dat sy al haar rekenaarinligting verloor het. (Gansbaai Courant, Donderdag, 20 Februarie 2014). Sy het haar rekenaar na Hein van Wyk van Overtek Computers geneem. ‘n Onbekende wagwoord is op haar rekenaar geplaas en toe sy dit weer aan die gang probeer kry (“restart”), kon sy nie toegang tot haar eie rekenaar kry nie. Hein het te kenne gegee dat hy hierdie geval as “iets nuuts” beskou, aangesien dit nie die normale taktiek is wat deur oproepers toegepas word nie. Dit is nie ‘n gewone wagwoord wat op die rekenaar geplaas word nie, maar ‘n “register-wagwoord” (“registry”). Hein sê sy assistent, Gerhard van Dyk, het lank met die probleem geworstel, maar kon wel daarin slaag om die spesiale wagwoord te omseil, sonder enige verlies van rekenaarinligting. Met verwysing na die oproeper se dreigemente dat hy toegang tot haar bankbesonderhede het, het Hein gesê dit is gewoonlik bangmaak-praatjies, aangesien dit nie telefonies en sonder die medewerking van die betrokke persoon gedoen kan word nie.

“Dit kan gebeur dat die oproeper op een of ander wyse wel kan sien van watter bank die persoon ‘n kliënt is en dan voorgee dat hy daarop kan ingaan,” sê Hein. “My belangrikste raad aan enige persoon is om sodanige oproepe, wat suspisieus behoort te klink, summier te beëindig.” Hy het ook bevestig dat Microsoft óf aangestelde kontrakteurs van hulle, nooit ooit ‘n kliënt direk sal kontak nie. Kul-oproepe word eenvoudig net gemaak om ‘n kans te vat en word soms selfs na mense gemaak wat nie eers ‘n rekenaar besit nie.