Daar is niks in oorvloed nie (behalwe dalk hotties), maar daar is ook niks om oor te kla nie. Die bootmanne het nie sleg gevaar nie. Die mooier weer en baie warm water (tot soveel as 24 grade, by tye) is dalk die rede daarvoor. Buiten die genoemde hotties, en dié is steeds spekvet, is daar ook geelbek gevang, kabeljou het gesig gewys, baie mooies, nogal. Die romanne is redelik volop en soos die bygaande foto aandui, is daar mooi PW’s, oftewel rooistompneuse. Dan is daar baie aasvis soos harders, maasbankers en ook elwe. Makriel word so tussenin gevang.

Albert Potgieter met sy mooi PW, ‘n hele 5.2 kilogram, en 60 cm, aangekeer by Joubert se Dam.

 Iets baie eienaardig het met my gebeur. Ek het ‘n groot gedierte (vis of haai, weet nie) aangehad en in die skoon water kon ek waarneem hoedat die lyn deur ‘n bamboes gevleg word. Die vis was onsigbaar agter die bamboes, en stewig vasgehaak. Uiteindelik het ek besluit om die lyn maar te breek. En nou die snaaksigheid  --  elke keer wanneer ek hard aan die lyn trek het ‘n groot aantal lugborrels na bo ontsnap. So het dit lank aangegaan. ‘n Rob? Onmoontlik! Dalk lug wat ontsnap vanuit die bamboesstele. Enigeen ‘n idee wat dit kon wees?

Die weer op die oomblik is ideal om see toe te gaan, en die visvangery word bysaak soos die dag aangaan. Al wat mens moet doen is om die tydjie te waardeer. Wat jou altyd bybly is die sonsopkoms/ondergang. Van die boot af is dit, tesame met die see wat die prentjie voltooi, eenvoudig asem wegslaan mooi.

Die winter is omtrent hier en die weer reeds aan die verander. Die Paasnaweek is op hande. Welkom aan al die besoekers. Geniet die tydjie saam met ons en wees asseblief versigtig, met die rondryery, maar veral wanneer die see besoek word. Wees altyd op die uitkyk vir enige iets wat jou ongerus stem. Maar, geniet die vakansietyd! 

Groete, Seemeeu