Alfred Daniel Frans (59) van Stanford het verlede Vrydag volgens sy familie gaan houtmaak toe hy deur ΄n motor getref is en gesterf het.

Volgens Adj Off S Hugo was ΄n dame en haar vriendin om 18:45 met haar Hyundai op pad van Caledon na Gansbaai. Sy het op die R43 hoofpad naby Tembilihle (Hopland) vir ongeveer 80 meter agter ΄n voertuig gery.

Terwyl sy agter die voertuig gery het, het sy 'n groot tak aan die linkerkant van haar voertuig gesien asook 'n donker vorm. Omdat dit reeds donker was kon sy nie sien wat dit was nie, maar het 'n slag teen haar voertuig gevoel.  Nadat sy die slag teen haar voertuig gevoel het, het sy rem getrap en gestop.

Nadat sy gestop het, het haar vriendin vir haar gesê dat sy moet omdraai en na die naaste polisiestasie gaan om die voorval te rapporteer aangesien dit gevaarlik was waar hulle gestop het. Terwyl sy omgedraai het en weer in die rigting van Stanford gery het kon sy nie enige tak of persoon in die omgewing sien nie. Sy het toe die voorval by die SA Polisiediens Stanford aan Konstabel Mnqwazi gerapporteer.

Terwyl sy die voorval gerapporteer het, het die klagtekantoor  'n klagte ontvang dat 'n persoon op die R43 omgery is.

Konst Mnqwazi het die klagte bygewoon en 'n persoon met kopbeserings langs die R43 gekry. Die ambulans was ontbied en hul het die persoon op die toneel dood verklaar.

Francois de Jongh