Staci Bester (21) is ‘n knap danser op verskeie gebiede en is tans in diens van Grootbos waar sy opleiding ondergaan. Sy het in Gansbaai grootgeword, maar het reeds op 11-jarige ouderdom saam met haar ouers verhuis. Staci se pa, Terry Bester was ‘n welbekende in die arera en het ‘n loodgietersbesigheid besit. “Ek was ‘big daddy’s girl’ en my pa was ook die een wat my geleer het om te dans, maar ek het hom op 10-jarige ouderdom as gevolg van maagkanker verloor,” vertel Staci. Hulle het na die Oos-Kaap verhuis waar haar ma haar by Arts Academy ingeskryf het. Staci was vir 6 maande in Australië waar sy by verskeie dansstudios betrokke was, met haar hoogtepunt as die Burlesque werkswinkel waar sy baie geleer het rakende mense en die geskiedenis van dansstyle.

Staci is nou sowat 1½ maande by Grootbos en ontvang opleiding in die kuns van gasvrou in die drank- en voedselafdeling. “Ek is baie gelukkig daar en het ‘n ware ‘Grootbos-familie’ ontdek,” sê sy.

Staci vertel dat sy dankbaar is dat sy vir Lynette van Wyk raakgeloop het wat haar oë vir ‘n heel nuwe sangwêreld oopgemaak het. “Ek het haar sover gekry om weer haar dansskoene aan te trek en ons het groot planne vir die dorp en ander plekke met dansoptredes.”

Lynette het onlangs gereël dat Staci tydens ‘n Erediens van Gansbaai Family Church optree, wat sy terdeë waardeer en geniet het. “Deur Staci se toedoen het ek weer uit my ‘aftrede’ geklim en besluit om my dansskoene aan te trek en ek glo saam met Staci dat ons twee deur God se weë om ‘n goeie rede bymekaar uitgekom het om dinge saam te doen,” sê Lynette.

Hardus Botha