“Op 10 Junie om ongeveer 23:30 het ‘n dame in Stanford wakker geword met ‘n geluid wat vir haar soos die gekrap van ‘n voël op haar dak geklink het,” skryf Adj-Off Hugo, Kommunikasie: Stanford SAPD. “Die dame was nog deur die slaap toe sy by die venster uitkyk en het niks gewaar nie en teruggeklim in haar bed.” AO Hugo sê die dame was sonder haar seun alleen in die huis en het weer van dieselfde geluid wakker geword. Sy het ‘n skaduwee in die donker gesien en eers later die kaalvoet-voetspore op die teëls in elke vertrek gesien, met baie swart roet van die skoorsteen by die vuurherd. Toe sy die polisie wou skakel, het sy besef haar handsak met haar selfoon was weg, asook ‘n tas met klere wat in die slaapkamer gestaan het. Die polisie het ‘n leer aan die buitekant gekry, waar die inbreker deur die skoorsteen toegang tot die huis verkry het. “Ons vermoed dus dat die inbreker óf baie maer is, of ‘n jong persoon moet wees,” sê AO Hugo. Die dame se Britse paspoort en bestuurderslisensie is op 12 Junie op Stanford se rugbyvelde gekry. Die verdagte is onbekend en geen arrestasies is nog gemaak nie. Persone met inligting kan Stanford SAPD by 028-341-0601 skakel.

Hardus Botha