Elias (alias Dumy) Adendorf (26), wat as 'n reeksinbreker reeds berugtheid verwerf het, is sowat 'n maand gelede op parool vrygelaat. Getrou aan sy nering het hy egter glo na bewering op Sondagnag 6 Julie op die klein gemeenskap van die PJ Gerber Natuurreservaat toegeslaan en by 11 huise ingebreek. Sommige eienaars was tuis maar het nie wakker geword nie.

Elias was ook in Junie 2010 in die nuus deurdat hy hom toe sonder 'n draad klere aan, deur 'n handgrootte vensterdiefwering  by Steenbokstraat in Kleinbaai ingewurm het. Die eienaar, Deon Botha en sy vrou, Marlene, se hondjies het hul op die tweede verdieping wakker gemaak. Die agterdeur het daarna geklap en die inbreker het ontvlug. Hy het egter sy klere, skoene, 'n lang jagmes in 'n skede en sy selfoon op die buitenste vensterbank laat lê. Hy is kort daarna gearresteer.

Elias het reeds in die hof verskyn vir die inbrake by die natuurreservaat en bly in aanhouding. Die ondersoekbeampte, Sers Leon Crafford, het bevestig dat van die gesteelde eiendom wat by die 11 huise gesteel is in Hermanus opgespoor is en dat Elias direk daarmee verbind word.

'n Tweede verdagte, Gilbright Visser (24), van Hermanus is ook met die inbrake en verkope van die gesteelde ware verbind.

Francois de Jongh

Zoom