“U het my van jongs af onderrig, o GOD, en ek getuig nou nog van u kragtige dade. Nou dat ek oud en grys geword het, moet U my tog nie alleen laat nie, o GOD, dat ek nog aan die geslagte wat kom, kan vertel van u werk en u mag.” (Ps 71:17,18) 

“I’ve outlived my usefulness.” Dit was die woorde van ’n Amerikaner, Bill Knight,  toe hy eenkeer moes antwoord of hy nog nuttig voel. Hy was al baie oud en eensaam. Toe besluit hy om Amerikaanse soldate wat uit Irak teruggekeer het by ’n plaaslike lughawe te verwelkom. Net dit. Hierdie eenvoudige stukkie omgee het kort voor lank wyd bekend geraak. Vele ander bejaardes het sy voorbeeld begin volg. Bill Knight se opregte handdruk waarmee hy terugkerende soldate verwelkom het, het vir baie mense sinoniem geword met omgee. Later het selfs George Bush, die eertydse Amerikaanse president hom ontmoet. Ook daar is ’n dokumentêre film oor hom en ander ouer persone gemaak wat soldate gaan verwelkom het.

Hoeveel van ons dink dat ons niks meer beteken vir GOD en Sy Koninkryk omdat ons al oud geword het, te jonk is, of dalk nie baie geld besit of onbekwaam voel nie. Jesus het geweet hoe maklik mense hulleself kan afbreek omdat hulle onbelangrik voel. Daarom het hy op ’n dag gesê dat nie eens die kleinste daad van deernis, soos om ’n beker koue water aan een van sy kinders te gee, ongesiens by GOD verbygaan nie. (Mat. 10:42 Onthou net dat jou woord van bemoediging, jou vriendelike glimlag of jou sagte oë teenoor iemand anders daardie persoon se hele lewe kan verander. As jy uit jou huis uitgaan word die wêreld om jou GOD se werksplek. Hy gebruik jou om by iemand te gaan stilstaan en belangstellend te vra hoe dit gaan. Jou handdruk, jou aanraking word in GOD se plan ingewerk as ’n daad van Jesus se liefde. Een vir een, daad vir daad begin jy die wêreld verander en is jy meer as nuttig in GOD se koninkryk op aarde.

As ek en jy, of ons baie oud of baie jonk is, net van vandag af begin om aan die één mens wat gedurende die dag op jou pad kom, één daad van deernis en omgee te doen, sal die wonderwerkende krag van GOD se liefde die aarde begin verander. Wie weet hoe nodig die mense om jou na liefde soek nie. Kom laat ons nie langer talm om aan mekaar daardie één daad van omgee te doen nie.