Die straatparkering voor Gansbaai Poskantoor raak nou ‘n berugte parkeerarea. “Hierdie voertuig wat sonder ‘n bestuurder van die Poskantoor straat-af geloop het, is minstens al die agste geval net vandat ek my besigheid hier geopen het,” vertel Johan Pieterse van Studio Jo-Signs. “Volgens inligting wat ek bekom het, was daar minstens nog twee soortgelyke voorvalle voor my tyd.”

Genoemde insidente begin telkens voor die Poskantoor waar die voertuie sonder bestuurders “die pad vat” - óf in die rigting van Studio Jo-Signs, óf net af in Hoofstraat, óf dit swaai in by Markstraat. Johan vertel van een geval waar daar twee kindertjies agter in die motor gesit het. “Die ouers het al hul pakkies net so op die sypaadjie neergegooi en agterna gehardloop, met die kleingoed wat ewe vrolik deur die agterruit vir hulle gewaai het.

Hierdie keer was dit Wayne Paizes van bioMassives se Ford Ranger wat op Donderdag, 21 Augustus 2014 “die pad gevat” het - ook vanaf die Poskantoor, maar dié keer verby Studio Jo-Signs waar dit teen Gansbaai Djolof Shop (waar Dit en Dat voorheen was) se ingangsmuur tot stilstand gekom het - sonder Wayne agter die stuur.

Johan het onlangs besluit om ‘n humor-plakkaat te druk, wat hy direk ná die laaste voorval teen sy deur vasgesit het: “We apologise this is unfortunately not McDonald’s”! 

Hardus Botha

Zoom