“Ek leef in vrees, veral snags, en het al ‘n groot hond ook aangeskaf en 5 sensorligte buite aangebring,” vertel Lynette van Wyk wat direk langs die ou Dorpskombuis in Dirkie Uysstraat woon. “Behalwe vir die spanning met die onwettige nagslapers in die gebou, begin dit nou in ‘n ernstige gesondheidskrisis ontwikkel.” Die meegaande foto van een van die vertrekke kan hiervan getuig. Daar is selfs ‘n panga, hamer, byl en etlike skroewedraaiers in die absolute vuil vertrek waar daar duidelik in geslaap word. Die res van die foto’s wat geneem is, is nie vir publikasie doeleindes geskik nie. Van die vertrekke, maar veral die een vertrek, se volledige vloer word as ‘n toilet gebruik. In nog ‘n vertrek staan plastiekemmers wat met uriene gevul is. Dit is ‘n gesig van haglikheid, vuilheid en onhigiëniese toestande wat die besoeker aan Dorpskombuis begroet. Lynette en haar buurman agter haar, Keeth Hobkark, is ook baie bekommerd oor die deurvloei van reënwater as gevolg van geen geute en afvoerpype, wat reeds skade tot gevolg gehad het. Sy het twee skrywes deur Gansbaai munisipaliteit ontvang waarin die eienaar/s verplig word om spesifieke opknappingswerk te laat doen. Die eerste skrywe (5 Maart 2014) het na ‘n inspeksie wat uitgevoer is, verwys en bepaalde aspekte wat dringende aandag moet geniet, is uitgewys. ‘n Tweede skrywe (20 Mei 2014) is uitgereik waarin die eienaar/s na die inhoud van die vorige skrywe verwys is, met verwysing na spesifieke wets-gedeeltes van die Nasionale Geboue Regulasies en Bou Standaarde (Wet 103 van 1977: deel 12(1)) wat uitgewys is. “Op 31 Julie vanjaar het die eienaar en sy twee seuns my besoek en homself as Hussein Royker voorgestel,” sê Lynette. “Hy het gesê dat hy die probleem wil oplos, maar of ek kwotasies vir hom sal inwin, wat ek op advies geweier het, aangesien ek nie betrokke wil raak nie.” Sy sê hy het daarna onderneem om self kwotasies te kry, maar dat hy haastig is om te ry vir besigheid in die Kaap. Sy het nog nie weer iets van hom gehoor nie. “Die byl, panga en ‘n ou dagboek het ek as my eiendom geïdentifiseer wat uit my motorhuis weggeraak het,” vertel Keeth. “Hulle het ook twee van my trapleertjies geneem om oor die muur te klim, vanwaar hulle steeds toegang deur die dak van Dorpskombuis verkry.”

Hardus Botha

Zoom