Na 'n vlaag van inbrake in Franskraal, Kleinbaai en die dorpsgebied het die polisie die afgelope week suksesvol teruggeslaan. Jan Neels van Blompark het twee weke gelede na bewering 'n ingevoerde draf-babastootwaentjie uit 'n voertuig in Franskraal gesteel. Konst Ronel Pieterse het Neels ondervra en daarna die stootwaentjie gaan haal waar hy dit verkoop het. Nog vyf verdagtes is gearresteer vir huisbrake in Blompark. Hulle word verbind met 'n inbraak in Roosstraat en van hulle het ook te doen met aanranding- en diefstalsake in die middedorp. Die verdagtes is Presley Robertson, Julian Davids, Gary Delport, Gregory Witbooi en Johannes Hendrik (Apie).

In 'n losstaande voorval Maandagoggend is drie verdagtes deur die polisie gejaag nadat inligting van die publiek ontvang is. 'n Minderjarige seun (16) is gearresteer en 'n beursie wat in Seaviewlaan, Franskraal gesteel is, is teruggevind.

André Claasen alias Hasie (38) is Dinsdagoggend om 01:10 naby Gansbaai Courant se perseel in hegtenis geneem vir die besit van 'n gevaarlike wapen. 'n Deur is by die Courant se buitegebou oopgeforseer, maar die alarm is geaktiveer en die inbreker het hom uit die voete gemaak. Die moontlikheid dat Claasen met die inbraak verbind kan word, word verder ondersoek.

Al die verdagtes se borgaansoeke word weens vorige oortredings  teengestaan.

Francois de Jongh