'n Advertensie verlede Donderdag in Die Burger, en wat ook in hierdie uitgawe van Gansbaai Courant verskyn, is verkeerd gelees en geïnterpreteer. Dit het tot 'n klein oorlog met dreigemente van petisies in die sosiale media gelei.

Volgens die talle telefoonoproepe wat die Courant ontvang het, was dit duidelik dat die wolf tussen die ganse was. Die berig, “Stortingsterrein - Lig in tonnel” (Gansbaai Courant, Donderdag, 9 Oktober 2014), is op dieselfde dag as die advertensie gepubliseer, wat meegebring het dat die inhoud van die advertensie nie tot die Courant se beskikking was nie. Die klagte dat die stortingsterrein vergroot gaan word om Hermanus en Kleinmond se vullis te stort, was glad nie wat geadverteer is nie. Die advertensie het verwys na 'n ondersoek om die groen buffergebied tussen die huidige stortingsterrein van 800m tot 200m te verklein om voorsiening te maak vir verdere uitbreiding van Masakhane se woongebied. Voorheen het die permitbepalings vir die uitbreiding van die stortingsterrein bepaal dat 'n "geen ontwikkelings-buffersone" van 800m sou geld. DDA Omgewings Ingenieurs het pas hul lugkwaliteit inpakstudie en buffersone ondersoek afgehandel. Dit het getoon dat 'n buffersone van 200m gepas sou wees. Die voorstel lê nou ter insae by Gansbaai Biblioteek vir openbare deelname. "Overstrand Munisipaliteit is nie van plan om die plaaslike stortingsterrein te vergroot nie en Karwyderskraal se stortingsterrein sal Hermanus en Kleinmond vanaf April 2015 bedien," het Charl Cilliers gesê. “Lede van die publiek is welkom om geskrewe kommentaar aan Nosipho Mbunje, Withers Environmental Consultants, Posbus 6118, Uniedal, 7612 te pos, of e-pos dit aan info@withersenviro.co.za. Kontaknommers is 021-887-4000 of 021-883-2952.” Die sluitingsdatum is verleng na 26 November 2014.

 Francois de Jongh

Zoom