Twee welgeklede swart vroue het Saterdagoggend om 11:00 by Goose Bay Paints oor verdigtingsmateriaal navraag gedoen. Die eienaar, Stephanie Oosthuizen, is saam met die jonger een, wat verwagtend is en 'n swart reguithaarpruik gedra het, agter die rakke in. Die ouer vrou het voor by die toonbank gewag. 'n Swart man, wat ook baie welgekleed was en soos die vrouens ook baie goeie Engels gepraat het, het navraag oor dakverf gedoen en het Stephanie 'n geruime tyd besig gehou. Die twee vrouens is intussen by die winkel uit en Stephanie het kort na die man se vertrek agtergekom dat haar handsak, wat agter die toonbank was, gesteel is. Bankkaarte, haar beursie, ID-dokument en bestuurslisensie was in die handsak. Haar man, André, was ten tye van die voorval op die gholfbaan en het hom dadelik terug gehaas. "Dit gebeur nou elke Vrydag en Saterdag dat mense wat nie klante is nie, hier rondhang en in die winkel wil kom rondstaan. Winkeliers moet hierop bedag wees en die polisie bel as iemand verdag voorkom," het André Maandag gesê.        

Francois de Jongh

Zoom