Dames en gaste van die Bietoubos Damesklub van Perlemoenbaai en De Kelders het op 14 Oktober 2014 gesellig met “woord en kuns” saamgekuier. Elizma de Lange van die klub vertel dat Hettie Oosthuizen almal met ‘n prettige voorlesing van “Die Koei”, geskryf deur ‘n laerskoolleerder, vermaak het.

“‘n Mens kan jou maar net dié prentjie voorstel as dit eindig met ‘en as die koei vas in jou oë kyk, moet jy hardloop, want dan is dit ‘n bul….’,” vertel Elizma. Terselfdertyd kon die besoekers hulself verlustig in ‘n uitstalling van skilderye deur Olga Swanepoel en haar leerlingkunstenaars. Olga het aan die dames vertel hoe haar belangstelling in kuns ontstaan het uit haar werk in die Botaniese rigting toe sy aanvanklik verskillende plantspesies geteken het. “Waarom skilder ‘n mens? - Omdat jy wil en omdat jy dit geniet en in die proses vergeet jy van al jou sorge,” het Olga van “Kwaskanades” gesê.

Volgens Olga het elkeen sy/haar eie styl, en het met die skilderye wat sy saamgebring het, geïllustreer hoe die skilder deur ou skilders soos Van Gogh, Irma Stern en Pierneef geïnspireer word om hulle werke en styl te bestudeer. “Met die pragtige skilderye in die agtergrond, heerlike verversings, tee en goeie geselskap is die oggend genoeglik afgesluit,” sê Elizma. Die verantwoordelike gasvrouens vir die byeenkoms was Anita Huisamen en Annette van Zyl.

Vir Bietoubos-navrae kan Annette van Zyl (voorsitter) by 028-384-1075 gekontak word.

Hardus Botha

Zoom

Zoom