“Al het die weer nie saamgespeel nie, het die positiewe deelnemers vanjaar se Franskraal pretstap ten bate van ‘Reik na die Herstel’ bewys dat mense werklik omgee,” vertel Annaleen Genade, organiseerder van die pretstap op 16 Oktober 2014. Gelukkig het die reën met die terugstap bedaar en die deelnemers kon die saamkuier en prysuitdeling geniet.

Elke deelnemer het ‘n Chomp met die komplimente van Gansbaai Superspar ontvang: “CHOMP - Christus Help Ons Met Probleme”. Met Chrizülene van Niekerk se pienk- en groen getooide bome in Hoofstraat is Borskankermaand nog vars in almal se geheue. Annaleen het die deelnemers kortliks oor enkele borskanker-aspekte ingelig. Hulle is daarvan bewus gemaak dat pasiënte met borskanker deur ‘n Vrywilliger in die hospitaal of tuis besoek word. Behalwe vir die ondersteuning, ontvang elke pasiënt die volgende gratis items: dreinsakkie, kussinkie vir onder-arm, oefensponsie, tydelike “softee”, inligtingsboekie en brosjures met inligting oor moontlike behandelings wat kan volg na ‘n mastektomie. 

“Hierdie hulpmiddels word deur die Vrywilligers self gemaak en alle fondse wat ingesamel word, word daarvoor gebruik, asook om literatuur te laat druk en om die Ditto Projek (gesubsidieerde silicone prostese) aan pasiente te verskaf,” vertel Annaleen.

Gelukkige prystrekkings kon met die samewerking van die volgende borge plaasvind: Bon-Bon Materiale (pienk strikkies), Corra’s Klerewinkel (geskenkbewys), Gansbaai Book Exchange (geskenkbewys), Gansbaai Superspar (Chomps), Franskraal OK Value (geskenkbewyse), Pancake House & Chicken Land (geskenkbewys) en Protea Flora Bloemiste (blommeruiker).

“Baie dankie ook aan Gansbaai Courant vir die gratis publisiteit,” sê Annaleen. “Op spesiale versoek van werkende persone sal ons vir volgende jaar ‘n Skemerstap oorweeg.”

Vir meer inligting rakende die plaaslike Vrywilligers van Reik na Herstel Borskankerondersteuning Organisasie se Annaleen Genade by 072-523-0650 of Andriette Bruwer by 071-543-0904 gekontak word, of stuur ‘n e-pos aan Annaleen by annaleen.genade@gmail.com.

Hardus Botha

Zoom

Zoom

Zoom

Zoom

Zoom