Gansbaai Biblioteek het weer eens ‘n daadwerklike poging aangewend om kinders leesbewus te maak. As ‘n Leesprojek is goed-ontwerpte en verstaanbare vorms aan kinders uitgedeel. Daarin is gevra wat is hulle voorkeure van boeke wat hulle graag wil lees en wat is hulle oogmerke. Vyf van die vorms is terug ontvang - elk met minstens 10 boeke met die skrywers se name en in die kinders se handskrif. “Die doel van hierdie projek was maar net weer eens om kinders aan te moedig om meer gereeld te lees en die biblioteek te besoek,” sê Sharman Geldenhuys, Bibliotekaris. Die 5 leesgierige jongelinge (alfabeties) is: Carry-Ann Visagie (Gr 6), Faith Adams (Gr 5), Lukhanyo Mtiki (Gr 4), Mikayla Herselman (Gr 2) en Nicole Schutte (Gr 1). Elkeen het ‘n pragtige “Sertifikaat vir Lees” ontvang, asook ‘n geskenk-pakkie met ‘n leesboekie, skryfbenodigdhede en ietsie om te eet. 

Kennis moet geneem word dat Gansbaai Biblioteek op Vrydag, 14 November 2014 en Donderdag, 27 November 2014 gesluit sal wees. Dit is as gevolg van boekewa-besoeke deur die Wes-Kaapse Biblioteekdiens. “Ons vra om verskoning vir enige ongerief as gevolg van hierdie reëlings,” sê Sharman. “Boetes sal nie gehef word vir die geslote dae nie.” Indien lede se boeke gestempel is vir die betrokke dae, sal die datum met een dag aangeskuif word en indien hulle nie betyds by die biblioteek kan uitkom nie, kan die biblioteek telefonies gekontak word.  

Gansbaai Biblioteek se gerieflike bedryfsure is Maandae tot Vrydae vanaf 09:30 tot 17:30 en hulle kan by 028-384-8300 vir navrae gekontak word.

Hardus Botha

Zoom

Zoom