Die NG-gemeente van Gansbaai se jaarlikse Kersmark open op Woensdag, 10 Desember 2014 om 09:00 in die Pretoriussaal. Vrydagaand, 13 Desember is dit die gebruiklike aandmark, asook Vrydag, 19 Desember, waartydens die Kersmark vanaf 09:00 tot 21:00 oop sal wees.

Gansbaai Courant se Dagboek kan vir oop- en sluitingstye geraadpleeg word, maar kennis kan geneem word dat dit daagliks (uitgesluit Sondae) vanaf 09:00 tot 18:00 oop sal wees. “Vanjaar sal daar weer eens nuwe uitstallers wees, selfs vanaf Bloemfontein en Vredendal,” sê Linda Cilliers, organiseerder saam met haar eggenoot, Thys. Vanjaar is Francia van Dyk en haar span vir die restaurant verantwoordelik en die winste sal aan Diens van Barmhartigheid toegeken word om onder andere vir een van die maatskaplike werkers se salaris voorsiening te maak. Soos jaarliks die gebruik is, sal die voorportaal en verhoog weer eens ‘n lus vir die oog wees om te aanskou. Naas vele stalletjie-items wat te koop aangebied sal word, is daar ook meer as genoeg lekkernye soos smaaklike etes, nagereg, koek, tert, drinkgoed en veel meer.

“Die vooraansig van die Pretoriussaal het ‘n behoorlike “gedaanteverwisseling” ondergaan met Thys wat tydelike, maar netjiese, windskerms aangebring het,” vertel Linda. “Ons vertrou dat dit gaan help om die stormwinde by die saal se in- en uitgange te breek.”

Hardus Botha

Zoom