“Ek is nie bekommerd wanneer daar ‘n reuk vanaf Gansbaai Marine dorp toe waai nie, maar ek sal baie bekommerd wees wanneer daardie reuk glad nie meer daar is nie, want dit sal beteken daar is geen oes nie,” het past Johnny Hamman tydens die lewering van die Afrikaanse boodskap gesê.

“Jesus is die rede waarom ons vandag hier bymekaar is en al is omstandighede dalk nie altyd gunstig nie, God se seën is altyd gunstig.” Johan van Dyk sê hy is dankbaar vir die groot hoeveelheid diensgangers wat die jaarlikse Vissermans Dankseggingsdiens in Gansbaai hawe bygewoon het.

“Daar was sowat 330 mense wat gesit, gestaan en in motors gesit het, wat dit ‘n rekorgetal vir hierdie diens maak,” het hy gesê. Vir Januarie se Vissermans Verootmoedigingsdiens sal daar 100 stoele ekstra wees wat deur ‘n kerkgroep beskikbaar gestel sal word.”

Die verrigtinge is met Lofprysingsliedere deur Mike Schröder en Adri Ehlers begin. Stiptelik op tyd het dié twee met die diensgangers se samesang begin, met Athol Rankin en Jordan Linehan saam met hulle as voorsangers. Die Engelse boodskap is deur past Robert Johnson gebring. Hy het ook na God se alomteenwoordige seën verwys, ongeag die omstandighede. “Die volk Israel moes vir hul straf vir 40 jaar in die woestyn rondswerf, maar tog het God se seën nie ontbreek nie en het Hy steeds vir hulle gesorg, ongeag haglike en gevaarlike omstandighede,” het hy gesê. Die verrigtinge is met die gesamentlike sing van “Stille nag, Heilige nag” afgesluit. Soos gebruiklik was daar weer lekkers aan die kinders uitgedeel, wat terdeë geniet is.

“Soos jaarliks die geval is, sal hierdie mooi gebaar van ‘n diens in Gansbaai hawe nie moontlik wees sonder die hoofborgskap van Gansbaai Marine nie en ons dra graag ons opregte dank en waardering teenoor André Coetzee, Besturende Direkteur oor,” sê Johan. Kennis kan ook nou reeds geneem word van die jaarlikse Interkerklike Vissermans Verootmoedigingsdiens wat vroeg volgende jaar op 18 Januarie 2015  ook in Gansbaai hawe gehou sal word.

Vir navrae kan Johan van Dyk by 028-384-0035 of 083-537-7013 geskakel word.

Hardus Botha

Zoom