Thys Fourie was beslis die draer van slegte nuus toe hy op Dinsdag, 29 Desember 2014 die nuus van ‘n dooie rooikat aan Gansbaai Courant oorgedra het. “Die rooikat is waarskynlik vroeg vanoggend deur ‘n voertuig raakgery, aangesien daar nog vars bloed by sy kop was,” het Thys gesê. Die rooikat is op die nuut-oopgestelde Kleinbaai/Franskraal teerpad teen die laaste opdraende raakgery en is vermoedelik teen die kop getref. Wat ‘n groot jammerte! Niks kan aan ‘n bona fide ongeluk gedoen word nie, maar besoekers en inwoners moet maar te alle tye bedag wees op hierdie omgewing se kosbare dierelewe, skilpaaie, fisante en ander diere. Welliswaar sal almal moontlik nie saamstem nie, aangesien etlike huiskatte se verdwyning moontlik met rooikatte se teenwoordigheid te make het. Feit bly staan, dis ‘n wilde spesie wat bewaar moet word om hulle van uitwissing te red. Die rooikat wat in Oos-, Sentraal- en Suid-Afrika voorkom, is die Felis caracal en is ‘n soogdier en ‘n karnivoor. Daar is 36 wildekatspesies in die wêreld, met 3 hoofgroepe in die katfamilie: groot katte (Panthera), jagluiperd (Acinonyx) en kleiner katte (Felis). Die rooikat is lid van die felis-groep en is verwant aan die Felis Serval (tierboskat). Rooikatte word as een van die mooiste wildekatte beskou en word aan sy rooibruin (taankleurige) pels en lang swart haartossels aan die punte van sy gepunte ore en kort dik stert herken. Hulle skouerhoogte is tussen 40cm en 45cm, met die volwasse mannetjie wat 17kg kan weeg en die wyfie 11,5kg. Die rooikat is soepel en kragtig gebou met lang bobene en skerp intrekbare kloue. Die gesig van die rooikat word belyn deur 'n swart streep wat vertikaal deur elke oog loop en deur sy wit ken en swart bolip, met wit merke op sy keel, ken en maag. Die agterpote is heelwat langer as die voorpote. Hulle het ‘n lewensverwagting van 15 jaar terwyl 'n rooikat in aanhouding tot 17 jaar oud kan word.

Hardus Botha

Zoom