Met verwysing na vele navrae rakende Kobus du Toit van Vleispaleis se toestand, kan hiermee bevestig word dat dit onder omstandighede goed met hom gaan, maar dat ‘n lang pad van herstel op hom wag. Kobus het vanuit Hermanus Mediclinic aan Gansbaai Courant gesê dat ligamente ook geskeur het, maar dat sy been nie in traksie geplaas kan word vir die herstel daarvan nie, as gevolg van die erns van die besering aan sy linkerbeen. Kobus was op Donderdag, 8 Januarie 2015 in ‘n ongeluk op die Kleinbaaipad met sy motorfiets betrokke, nadat ‘n voertuig ‘n U-draai voor hom gemaak het. Sy linkerbeen is op 3 plekke gebreek wat onder operasie geheg moes word, ‘n veloorplanting moes gedoen word en 6 eenhede bloed moes as gevolg van bloedverlies toegedien word. Intussen is hy weer geopereer vir die herstel van die potjie in die heup wat uitgeglip het. Intussen is Kobus vanaf die Intensiewe Sorgeenheid na die gewone saal oorgeplaas en sterk daar aan, maar verduur steeds baie pyn en sal waarskynlik nog geruime tyd in die kliniek deurbring, met verdere operasies wat nie uitgesluit is nie. Hy is positief en sê die dokter is tevrede, maar daar wag sonder twyfel ‘n lang pad van herstel op hom. ‘n Regstelling in die vorige berig (Gansbaai Courant, Donderdag, 15 Januarie 2015) is die volgende: Kobus het nie met sy groot Honda Steed motorfiets gery nie, maar met sy heelwat kleiner 125 Voca motorfiets toe die ongeluk plaasgevind het. “Dit sou nogal iets gewees het om te aanskou indien Kobus met sy 125 Voca gedurende die winter na Sutherland sou gery het,” het Pieter Maree, voorsitter van die Scattered Links, Overberg Chapter se Gansbaai-tak vir motorfietsers, waarvan Kobus ‘n lid is, gesê.  

Hardus Botha

Zoom