“Die jaar 2015 is alreeds ‘n raps meer as ‘n maand oud en die Strand-Veld Voetslaanklub se maandelikse program vir die jaar is reeds versprei,” sê Roelof Diener, die klub se sameroeper.

“Ons stap weer elke eerste Saterdag van die maand op ‘n verskeidenheid van mooi en interessante roetes.” Hy sê Otto Boysen het reeds die eerste uitstappie in Januarie gelei, waar hulle die Duiwelsgatroete by De Kelders gestap het en ook van die grotte aan die kus kon besoek het. “Voorwaar ‘n goeie begin vir 2015!” Eerskomende Saterdag, 7 Februarie stap die op-en-wakker voetslaanklub in die Agulhas Nasionale Park. Hulle ry met voertuie tot by Rietfontein en begin dan vanaf “Die Gruis” na die Damme stap. “Die roete is sowat 10 tot 12km kuslangs en die terrein varieer tussen rotsagtig tot ‘n lekker lang sandstap tot by die Damme,” sê Roelof.

Die stappers vertrek oudergewoonte om 07:00 vanaf die parkeerterrein voor Gansbaai Toerisme en gemaklike stapskoene, ‘n warm baadjie (ingeval die weer sleg is) en genoeg water en iets te ete in jou rugsak sal ‘n goeie aanbeveling wees. “Sommige mense sal hul voertuie vir saamry beskikbaar stel, en die res moet dan ‘n saamrygeleentheid by een van hulle kry.” Roelof stel voor dat stappers sowat R40 saambring om tot die voertuigeienaars se brandstofkostes by te dra.

Vir enige navrae kan Roelof Diener by 082-552-5444 gekontak word.

 Hardus Botha

Zoom