“Tannie Glenda Kitley, Gansbaai Toerisme se Bestuurder, het vir my gevra of ek nie jongmense kan kry sodat ons ‘n Gansbaai Jeugklub op die been kan kry nie,” vertel Elzaan van Lill. “Ek het toe daarin geslaag om ‘n paar staatmaker jongmense bymekaar te kry en ons almal is ewe opgewonde oor die gedagte.”

Die begrip “jeug” omskryf hulle as 16-30 jariges. Die kerngroep jeuglede wat glo hulle gaan hierdie inisiatief laat werk, is Elzaan van Lill (voorsitter/sameroeper), Mulcolm Mulope (ondervoorsitter), Nkosinathi Ally Msweli, Lelethu Klaas, Stefan Kruger, Zandré Nelson, Daniel Boshoff en Emeul Sauls.

Naas enkele beplanningsvergaderings wat al plaasgevind het, beplan hulle om op 1 Maart vanjaar by De Uijlenes bymekaar te kom vir behoorlike beplanning en die vasmaak van datums. Interessante idees wat al bespreek is, is onder andere ‘n sport- of boeresportdag, skattejag, nagskattejag, fliekaand, talent-aand, musiekaand, speletjiesaand en veel meer.

Die groep neem ook kennis van ander datums wat deur Gansbaai Toerisme beskikbaar gestel word om te sorg dat hulle ook daar betrokke sal wees, of teenwoordig sal wees. Hulle dink ook aan geleenthede waar hulle meer oor die geskiedenis van Gansbaai kan leer, of selfs om ‘n opvoering in daardie verband te reël. Selfs ‘n interne fotokompetisie is nie uitgesluit nie. Indien hierdie kerngroep vasbyt en deur ander jongmense vanuit Gansbaai, Blompark en Masakhane ondersteun word, kan hierdie inisiatief slaag.

 Daar word ook reeds aan ‘n eie embleem (logo) gewerk.

‘n Baie belangrike datum vir jongmense om ‘n aantekening van te maak, is Donderdag, 5 Maart 2015 wanneer daar ‘n “ope-vergadering” om 18:00 by Gansbaai Toerisme sal plaasvind. Alle jeug (16-30) is welkom om die vergadering by te woon en insette te lewer om by te dra tot die sukses van hierdie mooi inisiatief. Die groep is reeds op Facebook as “Gansbaai Jeug”.

Vir navrae kan Elzaan van Lill by 079-880-4035 geskakel word, of stuur ‘n e-pos aan haar by gansbaaijeug@gmail.co.

Hardus Botha

Zoom