Die aanvallige blondekop sakevrou was nog die een oomblik op die boonste vloer in haar slaapkamer, en toe hulle weer kyk het sy spoorloos verdwyn. So sê twee bronne wat voor verlede Saterdagnag deel was van ‘n operasie om perlemoensmokkelaars in Bettysbaai vas te trek.

Die operasie is geloods na die polisie se AO Dippie Dippenaar en sy kollega, konstabel Geldenhuys inligting ontvang het dat daar onwettige perlemoen by ‘n eiendom in Myricastraat in dié kusdorp gestoor word. Hulle het dadelik Seevisserye en CapeNature in kennis gestel. By hulle aankoms is een van die grootste perlemoenvondse wat tot nog toe in die gebied gekry is, in vrieskaste buite die huis gevind - meer as 1500 perlemoene met ‘n geraamde waarde van sowat R200 000 sou dit in Gauteng gelewer kon word. Die huis, wat glo aan ‘n predikant van Robertson behoort, is die afgelope tyd deur Louis en Elizette Theart Steyn gehuur. Die egpaar is bekende gesigte op Kleinmond waar hulle vir ‘n tyd lank die bekende Boathouse restaurant in die hawe besit het. ‘n Nuwe eienaar het sedertdien oorgeneem. Louis Steyn is tydens die Saterdagnag se klopjag in hegtenis geneem en aangekla van die onwettige besit van perlemoen. Sy vrou, die aantreklike 45-jarige Elizette, het egter klaarblyklik soos mis voor die spreekwoordelike son verdwyn. Louis Steyn het die Maandagoggend in die landdroshof op Caledon verskyn en is daarna op Kleinmond aangehou totdat borgtog die Donderdag aan hom toegestaan is. Wat die storie buitengewoon maak, is dat die einste Elizette Theart Steyn (voorheen Marx) net meer as 10 jaar gelede op Gansbaai aan die spits van die grootste enkele perlemoensindikaat, wat op daardie stadium nog in die land oopgevlek is, was. Die sindikaat is aan die kaak gestel toe die destydse Skerpioene op 2 Desember 2002 in hul kenmerkende swart VW Golf die dorp binnegery en mense begin in hegtenis neem het. Uiteindelik is 33 mense gearresteer en sy is effektief tot 4½ jaar tronkstraf gevonnis. Daar is ook op haar bates wat ‘n dubbelverdieping huis in Gansbaai, talle luukse voertuie en bote ingesluit het, beslag gelê. Daar word vermoed dat die sindikaat tussen die jaar 2000 en 2002 soveel as 90 ton perlemoen uitgehaal en verkoop het. Die onwettige besigheid wat met deeglikheid deur Elizette en haar vier vroue luitenante bestuur is, het haar in ‘n kwessie van drie jaar van ‘n brandarm kelnerin by ‘n restaurant in Struisbaai in ‘n multi miljoener verander.

Elizette is na haar tronkstraf in 2012 met Louis Steyn getroud en hulle het aan die einde van 2013 die Boathouse restaurant oorgeneem. Dit is egter nie meer in hulle besit nie.

Gerard Grobler, Overstrand Herald

Zoom