Die afgelope maande lyk my werkstafel asof ʼn orkaan dit getref het, maar stadig maar seker word die een hoop kleiner en die hoofstukke op die rekenaar word meer. Die gesoek na Gansbaai en omgewing se verlede het ons meer en meer laat besef hoe belangrik ʼn gemeenskap se daaglike doen en late is – en nog meer – hoe belangrik om dit te boekstaaf en om elke foto, knipsel en selfs briewe te dateer. Ons spandeer soms ure om datums met foto’s en gebeurtenisse te laat ooreenstem.

Daarom het ons besluit om ook Gansbaai se huidige gemeenskap te boekstaaf en die afgelope weke het ek alle gemeenskapsorganisasies probeer kontak. Probeer is werklik die regte woord, want soos die jare aanstap, raak mens minder betrokke by sosiale organisasies en verloor jy tred met wat in en om jou dorp aangaan.

Ons wil ʼn ernstige beroep doen op alle organisasies, kerke (alle denominasies), skole, sportklubs (hengelklubs ingesluit) om ASSEBLIEF terugvoering te gee. Dit sluit alle gemeenskappe in. Vanaf Masakhane, Blompark, PearlyBeach, Baardskeerdersbos, Kleinbaai, Gansbaai tot by De Kelders. Indien ek u gekontak het en u reeds terugvoering gegee het, baie dankie. Indien u nog niks van my gehoor het nie, weet ek nie van u organisasie nie en hoop ek dat u tog wel sal reageer.

Al wat ons van u verlang, is om 100 tot 150 woorde oor u organisasie te skryf. Stigtingsdatum, ledetal, fondsinsame-lings, betrokkenheid by feeste of enige ander sosiale betrokkenheid. Moenie bekommer oor hoe u dit saamstel nie – dit word wel weer geredigeer.

Stuur dit aan sdfourie@telkomsa.net of lewer af by die Toerisme Buro of Strandveld Museum. Sluit asseblief u naam, organisasie en telefoonnommer in.

Oor vyftig jaar beplan die mense van die dorp moontlik ʼn nuwe boek en dan het dié gemeenskap van vandag help skryf aan 2015 se geskiedenis.

Jan en SD Fourie, 082 255 8509

Zoom