Soos al ‘n paar keer gebeur het, fnuik weersomstandighede die Birkenhead Boothengelklub op kompetiesiedae, maar beslis nie die “agterna” funksie nie. Daarvoor is hierdie klub te op en wakker - jammer vir die hengelaars wat nie kon uitgaan nie. Die onlangse funksie het gesellig verloop met Johan en Suzette Wiese wat vir die onthaalgedeelte verantwoordelik was. Die klub is ook gereeld gewild onder oorsese besoekers, asook gereelde besoekers vanaf Hermanus. Tydens hierdie funksie het Philip en Lorraine Fourie se gaste vanaf Montrelette, Suid-Frankryk, Ian en Jenny Hazelton saam gekom en hulle het behoorlik gedans dat die spreekwoordelike stof staan en ook gesê dat dit ‘n besonderse ervaring vir hulle was. Nog besoekers was Gerry en Sandie Westmacott van Greyton, asook die alombekende Jack en Anita Doyle van Engeland. Later die aand is Annette Carstens deur Johan Wiese gevra om die gelukkige kaartjie vir die bottel wyn te trek - en Annette trek toe sowaar haar eggenoot, Johan Carstens se kaartjie - so moet ‘n gelukkige huwelikspaartjie mos met mekaar wees! Raymond Rabe het weer eens gesorg dat die jeukende dansvoete die hele aand aan die beweeg bly en daar is tot laataand gesellig saamgekuier. Die volgende hengelkompetisie en gesellige funksie is vir Saterdag, 11 April 2015 geskeduleer en kennis kan nou reeds geneem word van die klub se jaarlikse en gewilde Moedersdagete op Sondag, 10 Mei 2015. Funksie- en algemene navrae kan aan Johan Wiese by 084-680-1269 of voorsitter Philip Fourie by 082-747-3634 gerig word, met kompetisienavrae aan wedstrydsekretaris Johan Burmeister by 082-895-7647.

Hardus Botha

Zoom