Vakansietye en langnaweke se welkome besoekers, asook inwoners, bevind hulself ongelukkig altyd in frustrerende verkeersopeenhopings by die 4-rigtingstoppe voor die munisipale-kantore en die Great White Junction sentrum, asook by die kruising na die industriële gebied, Kleinbaai en Pearly Breach net buite Gansbaai. “Ons het besluit om vanjaar ‘n proefneming met puntdiens by altwee hierdie 4-rigting stopstrate te doen, met die vertroue dat dit ‘n bydrae tot beter verkeersvloei sal lewer,” sê Francois Myburgh, Areabestuurder van die Overstrandse Munisipaliteit se Gansbaai Administrasie. “Bestuurders word ook aangeraai om van alternatiewe roetes soos deur Blompark gebruik te maak,” het mnr Myburgh gesê. “Verder sal so ‘n groot as moontlike gedeelte van die nuwe teerpad tussen Kleinbaai en Franskraal ook teen die naweek oopgestel wees, wat groot gerief vir Franskralers te weeg sal bring.” Motorbestuurders word versoek om geduldig en versigtig te bestuur om sodoende te verseker dat veral besoekers aan Gansbaai en omgewing hul verblyf nie net sal geniet nie, maar ook sonder probleme na hul tuistes sal terugkeer.

Hardus Botha

Zoom