Terwyl die seetemperatuur al vir ‘n paar dae 9 grade was is dit te verstane dat vangste nie van die wonderlikste was nie. Tog is heelwat mooi visse gevang. Nodeloos om te meld, die hotties is spekvet. Daar moes omtrent gesoek word om ‘n makriel aan te keer en die dakspykertjies (klein snoekies) is amper te klein om selfs as aas te gebruik. Van hierdie goedjies gepraat, in sulke koue water krimp alles mos tot daar feitlik niks van oor is nie!  Het die snoekies wat redelik oor “size” was nie diesellfde oorgekom nie? Teen die tyd dat die Courant verskyn het die seetemperatuur hopelik gestyg en dit behoort tot beter vangste te lei.

Vir my is April/Mei die oorgangsmaande wanneer die vis ander patrone aanneem. Indien jy vergelyk met vangste in die verlede was daar buitengewoon baie vis soos geelbek gevang. Kabeljou wag net vir die meer onstuimige water om te verkas na dieper water maar behoort reeds by plekke soos die Moddergate rond te dwaal. Daar word ook baie mooi silwervis gevang (ook bietjie vroeg in die jaar), so maak gereed vir dinge wat gaan opwarm. Die enkele stokvis wat so twee weke terug naby die Eiland opgetel is is ook insiggewend. Wanneer laas het hulle hul opwagting gemaak?

Die Birkenhead-bootklub se kompetisie het goeie resultate gelewer en daar is geen rede om te kla nie, heelwat vis is ingeweeg.

 Mens moet natuurlik die weer bestudeer en jou daarvolgens instel. Sodra daardie halwe stormwinde kom moet jy jou maar gereedmaak om tot aksie oor te gaan. Intussen bly dit een van die aangenaamste dinge om jou dag rustig op see deur te bring. En die element van verrassing is altyd daar. Van die dierasies dwaal ook maar rond waar hulle wil en wanneer hulle so voel en voel blykbaar vere oor die toestand van die weer. So die kans is altyd daar, gebruik dit!

Dit lyk asof die bankvis na aan die kant hou en indien jy tevrede is met hotties  is dit onnodig om ekstra brandstof te bestee. Vir roman kan so effens dieper gesoek word.

Groete, Seemeeu

Zoom