Drie broers van Masakhane staan tereg op 'n klag van moord nadat hul na bewering 'n man, wat hul perlemoen wou steel, doodgeslaan het. Xolisa Nzame (29), Fundile Nzame (31) en Avuyile Nzame (20) het gestroopte perlemoen op die herboude verbyteerpad agter Franskraal gedra. Volgens hulle wou drie mans die perlemoen by hul afvat. Die draers het weggehardloop omdat hulle gedink het dat dit polisielede was wat hul voorgekeer het. Toe hulle egter agterkom dat dit nie so is nie, het hul na die toneel teruggekeer en net een man, Nmzoxolo Vuka (53), daar aangetref. Die ander twee was reeds vort met die perlemoen. Hulle het vervolgens houtpaaltjies, wat langs die pad gestaan het om die hoogte van die opvullings aan te dui, geneem en Vuka daarmee geslaan. Albei sy arms is gebreek, hy het ook ernstige kopbeserings opgedoen en het later in die hospitaal gesterf.

Die beskuldigdes het na die aanval vir Ntsingiselo Mbuzeni (34) gebel om hul met sy voertuig te kom haal. Nadat hulle opgelaai is het hy in die verkeerde rigting gery en moes by padaanbouings omdraai.

'n Inwoner van die nabygeleë woonbuurt het gille gehoor. Secma het ondersoek ingestel, die beseerde langs die pad gekry en die polisie ontbied. Die polisie het die pad versper en die verdagtes is op pad terug gearresteer.

Die vier verdagtes is op borgtog van R2000 vrygelaat, maar moet daagliks by Hermanus se polisiestasie aanmeld. Hulle mag glad nie in Gansbaai kom nie.   Die saak is uitgestel tot 13 Julie vanjaar.

Francois de Jongh

Zoom