'n Verdagte aankoper van gesteelde ware en 3 inbrekers, wat na bewering aan hom gelewer het, is verlede week vasgetrek. Peet Bouwer (47) van Kleinbaai is gearresteer nadat 'n gesteelde TV in sy huis gevind is. Verder ondervraging het die polisie gelei na 'n motorhuis van 'n vakansiewoning in Franskraal waar 'n groot aantal gesteelde goedere gevind is. Dit sluit 6 skootrekenaars, Ipads, GPS'e, selfone en katrolle in.

Dié deurbraak is gemaak nadat 'n verdagte, Johannes Hendriks (21), verbind is met 'n huisbraak in Blompark waarna 'n TV verkoop is. Die ondersoek en inligting het die speurders gelei na Bouwer se huis in Kleinbaai waar die TV gevind is. Die ander gebergde gesteelde eiendom is daarna deur Bouwer uitgewys. Twee verdagtes Romano (Plankies) Tobias (24) en Roderick (Tarot) Dunston (24), is later vir diefstal uit motorvoertuie gearresteer en nog klagtes van huisbraak word tans teen hulle ondersoek. Hulle het na bewering hul gesteelde ware aan Bruwer verkoop.

Al vier verdagtes is gearresteer. Bouwer is op borgtog met voorwaardes vrygelaat omdat hy geen vorige veroordelings het nie. Die ander drie verdagtes is in aanhouding weens vorige oortredings. Aansoek om borgtog moet nog gedoen word.

Van die eiendom wat gevind is, is op Gansbaai Polisie se webtuiste op Facebook geplaas. Verskeie van dié items moet nog geïdentifiseer word.  Kontak die speurtak by 028 384 0201 met inliging.

Francois de Jongh

Zoom