“Ek het op my bed gesit en pas ‘n SMS gestuur toe ek die geritsel hoor, maar het aanvaar die slang sal weer weggaan soos in die ander kamer, maar die volgende oomblik het ek die eerste byt op my linkerheup gevoel en direk daarna die tweede byt,” vertel Delana Louw van Pearly Beach, ‘n rivier-ekoloog.

Sy is gereeld in Namibië waar sy in ‘n selfgeboude boskamp oornag. “Ons is gewoond aan slange daar wat ook gereeld in die huise is opsoek na rotte, maar dis die eerste keer wat ek dit beleef het dat ‘n mens letterlik deur ‘n slang aangeval word.” In die geval van die spesifieke slang, ‘n Mosambiekse Spoegkobra (Mozambique Spitting Cobra) het sy hom ‘n paar keer laat wegseil en later het sy in ‘n ander kamer gaan slaap. Die slang is agterna en het haar in die bed aangeval en op haar linkerheup gepik en direk daarna weer ‘n keer. Die insident het op 18 Februarie vanjaar plaasgevind. Delana het in haar motor geklim en halfpad na Tsumeb (73km) gery toe haar vriende haar gekry het. ‘n Uur en 10 minute later was sy by Tsumeb hospitaal vir behandeling, nadat etlike simptome van die gif al begin wys het.  

Die volgende dag is sy inderhaas na die Roman Catholic Hospital geneem. Die dokter het die bytmerk oopgemaak, wat omtrent die grote van ‘n handpalm was en 2 cm diep. In Windhoek kon hulle haar nie verder help nie en op 26 Februarie is sy met ‘n oop wond na Pretoria gevlieg waar sy twee operasies ondergaan het. Eers op 5 Maart kon die wond toegemaak word en, gelukkig vir haar, was plastiese snykunde nie nodig nie. Daarna het sy na Kaapstad gevlieg en het self na Pearly Beach gery waar suster Tertia Scholtz die wond begin behandel het. “Suster Tertia het uitstekende werk gedoen met haar behandeling en gereelde skoonmaak van die wond,” sê Delana. “Intussen het die wond sodanig verbeter dat ek binnekort na KwaZulu-Natal vertrek.”

Hardus Botha

Zoom

Zoom